En Usfluug in Norde vo Thailand Teil 2 (Chang Mai)

Mitem VIP Bus gahts 3 Stund vo Chang Rai uf Chang Mai und isch extrem komfortabel (riesigi Sitz, fast wie ide Business Class bim Flüger, me bechunt au Getränk und en Snack gratis). Chang Mai bütet ählich viel wie Bangkok es isch nur alles viel chliner, ruhiger und het viel weniger Verkehr. Taxis hend mir fast gar kei xe, nur Tuk Tuk und Mopeds. S het vieli herzigi Restaurants und bsunders guet het üs au de Saturday (und Sunday) Market gfalle. Mir hend grad Glück kha simmer am Weekend dete xi so simmer in Gnuss vo beidne Märt cho. Es het hunderti vo Ständ mit Kleider und allem mögliche aber vorallem d Essständ hend mir all usprobiertJ Statt brännti Mandle und Magebrot hets ez „twisty Potatos“, schoggi Waffle mit Cream, gsüessti Kürbismuffins mit Palmzucker und suschtigi bunti, unidentifiziertbari aber leckeri Sache gehJ D Thais wüssed ämel, wies d Fraue alocke chönd – all Dessert sind schön dekoriert oft Pinkig und xend stylisch us, so dases nurscho cool isch mit so eim die Hand umezlaufe;)

Was mer uf jede Fall empfehle chönd isch d Mae Rim Rundfahrt miteme Töff z fahre. E wunderschöni Route verbi a Orchideefarme, Kafi- und Riisplantage und eme super Wasserfall (Nam Tok Mae Sa) mit vielne Bademöglichkeite würklich e traumhafti Strecki für TöffahrerJ. D Strecki isch insgesamt 100 Km und cha guet a eim Tag gmacht werde. Uf halber Strecki simmerno vomene Monsunrege überracht worde und innerhalb Sekundene pflatschnass xi. Womer ufem Weg mal aghalte hend zum Tanke (irgendwo ime Bergdörfli) het de Verkäufer det so Freud kha mal Touriste zxe daser eus grad churzerhand iglade het i sim selbsterbaute Baumhuus z übernachte. Das wer echt no es abentürlichs Erlebnis xi mal die Höchi obe die Bäum z übernachte (zumal sis Hüttli extrem robust baut xi isch). Mir hend de aber dankend müesse ablehne wilmer wider zrugg uf Chang Mai hend müesse go üse Töff retourniere und zudem au s Hotel scho bueched und zahlt kha hend.

Au es Erlebnis isch de Bsuech vome Muay Thai Kampf (Thai Boxe) xi. Mir hend für 600 Bath die forderste Plätz grad bim Ring ergatteret und me oder weniger bequem ame Tischli mit Popcorn und Bierli de Abig verbracht. Da isch echt spannend so en Kampf mal live mitzerlebe. Bevor die einzelne Kämpfer sich gegenüber treted tündsich zerst ca. 1-2 Min. im Ring mental vorbereite. Das isch es richtigs Ritual, wo scho fast usxet wie en Tanz. Ingsesamt sinds 7 Fights xi vo verschiedene Gwichtslasse und sogar Fraue wo boxed hend. Im Stadium isches natürlich je me zuegschlage worde isch desto me abgange. D Stimmig isch super xi vorallem bim Special Fight, wo 8 Boxer BLIND (!) im Ring boxed hend und teils me umetorkled sind wie suscht öbis Au de Schiri het de eint- oder ander Kick abbecho;). In Bangkok werdet mer denn sicher mal no e Glägeheit finde, mal im Lumpini Stadium en Top-Fight gogä luegä…

Veröffentlicht unter Uncategorized | Hinterlasse einen Kommentar

En Usfluug in Norde vo Thailand Teil 1 (Chang Rai)

Pooah mir münd eu glaub nid sege was dass für es schöns Gfühl isch z Thailand z si!! Nebst em schöne, scho fast zu heisse (mir hend 37 Grad!!) Wetter und de THAI Massage gnüssemer vorallem s superfeine Esse. Die Thai Currys, Pad Thai, Mango Sticky Rice und Chayenne (Thai Ice Tea) hend mir schochli vermisst uf üsre Reis. Mir fühled üs echt richtig wohl i üsem zweite dihei. Thailand das Land des Lächelns macht sim Name alli Ehr und zaubred au üs jede Tag es Lächle ufs GsichtJ

Vo Bangkok us e Stund Flug entfernt isch Chang Rai, im Norde vo Thailand, nördlich vo Chang Mai. Eusi Kollege vo Kanada womer ufde Bootsfahrt z Halong Bay kenneglernt hend, hend so vom White Temple und Black House gschwärmt dassmer die unbedingt au hend wele go aluege. Und es hetsich also defintiv glohnt. De White Temple isch wunderschön baut und het fast es biz öbis vom Taj Mahal z Indie. Natürlich nid ganz so gross;-) Au s Black House isch en Bsuech wert xi. Es Künstler Huus mit luuter Gemälde und Statue etc. me chunt gar nid recht drus womer luege sell. Einersits hets wunderschöni Bilder ufghängt und anderersits teils skurili Statue oder z.B. Stüehl im Totekopf Design, Schlangeleder etc. Das ganze isch es Projekt vode Kunstuni z Bangkok.

Nach dem schwitzige Tag hend mir üs richtig gfreut no zude Hot Springs z gah. Ah het das guet tueJ De krönend Abschluss isch denn d Thaimassage xi womer det gno hend…obwohls nid bsunders schön usxe het und mer Reihe a Reihe mit de andere Lüüt glege isch wo sich au dureknete lah hend, isches eini vode beste Thai Massage xi womer je kha hend.. Hammer! Die ganzi Tour hend mir miteme TukTuk fahrer gmacht wo üs umechauffiert het. Er isch extrem fründlich xi un uf all üsi Wünsch igange, het uf Gepäck ufpasst etc.

Ame Strasserand z Chang Rai hemmer zudem es neus Thai Dessert entdeckt. Also mir isch übetribe..En Koreaner het üs ufde Strass agsproche wo grad uf sisi Dessert gwartet het. Ob mir das schomal probiert heiged. Es heisst „Boloi“. Richtig identifiziere hend mirs nid chöne aber es sind so bunti Riiskugle (xend us wie Lucky Charms) wo Zuckerwasser ufkocht werdet und denn mit Sesam überstreut und dezue Kokosglace und heissi gsüessti Kokosmilch drüber…J Mmmmh extreem fein…J D Nicole het grad drüü devo gmampft..;-0 ez gömmer mit em VIP 😉 Bus wiiter nach Chiang Mai bevormer wieder zrugg uf BKK göndJ

Veröffentlicht unter Uncategorized | Hinterlasse einen Kommentar

Halong Bay – Dolce far niente :-)

Halong Bay hend mir mitere coole 3 Tages Bootstour erkundet. S klassische Programm isch e Kayaktour durd Buchte xi, d Besichtigung von Surprise Cave, Floating Village und enre Farm wos Perl-Austere züchtet. Mir hend s Boot zeme mit 4 andere Päärli (usde USA, Uruguay, Kanada und Belgi) i üsem Alter teilt und hend super Stimmig kha:) Nachdem s Wetter leider zerst nid so mitgspilt het isch defür de zweiti Tag umso schöner worde, nid nur wettermässig, au suscht isch super xi will de Rest vode Gruppe nur e 2 Tagestour bueched kha het und drum alli wider mitem Boot abgreist sind. So hend mir schön e privati Tour mitem Boot für üs eleige kha inklusive Choch und KapitänJ
JWährend de Fahrt hendmir schön chli ufem Deck chöne sünnele und die wunderschöne Buchte vo Halong Bay (wo übrigens zum Weltkulturerbe khöred) gnüsse. Landschaft isch würklich beeidruckend mit dene viele Felse wo usem Meer raged. Wiiterläse

Veröffentlicht unter Uncategorized | Hinterlasse einen Kommentar

Sapa – es Lebe wie anno dazumal

Sapa isch würklich e Welt für sich. Üs chunts eigentlich fast me vor wie Tibet. D Lüüt laufed ganz bunt kleided mit vielne Tüecher und riesige Ohrering und Schmuck ume. Insgesamt lebed da vier verschiedeni Stämm jenachdem wems aghöred sinds andersch kleided. Grad am Afang sind üs d Fraue wo roti Kopftüecher treit hend ufgfalle. Wie mir erfahre hend, khöred die ame Stamm a, wod Fraue wenn sie ghürate sind sich d Haare sowie au d Augebraue abrasiered. Eigentlich au no speziell…..aber lieber sie wie mir;-) Wiiterläse

Veröffentlicht unter Uncategorized | Hinterlasse einen Kommentar

Hanoi

Mir münde eu glaub nid sege wie schräg üs das inecho isch wo mir die Business Class im Flüger vo Hue nach Hanoi gsesse sind…:) so riese Sitz sind mir eus gar nüme gwöhnt xi nach dene doch meist sehr iquetschte Busfahrte womer sogar teils nebst de Sitzreihe am Bode hend müesse 12h fahre will Bus überbueched xi isch…Da d Eco usbueched xi isch hend mir üs de chlini Luxus gönnt (au wenns nur en Flug vo 1h xi isch) und die 100 USD zahlt… da chan sich d’Swiss Business es Bispiel drah näh 😉 Wiiterläse

Veröffentlicht unter Uncategorized | Hinterlasse einen Kommentar

Nach eifachluxuriös;)

In Nah Trang hemmer üs ime traumhaft schöne Six Senses Beach Boutique Hotel iquartiert – Nebesaison bzw. Hot Summer sei Dank – hemmer en Special becho mit 40% Rabatt:-0 Mir münd glaub nid säge wie sehr mir das gnosse hend wiedermal ime richtig schöne Hotel abzstige…Biz Luxus mun halt zwüsched dure scho au chli si..;-) Agfange vom Zimmer, hi zum Beach, Pool, riiiiiesgem Brunchbuffet, alles fantastisch xiJ Wiiterläse

Veröffentlicht unter Uncategorized | Hinterlasse einen Kommentar

Ho Chi Minh City – City of Motorbike

En bessere Empfang alsmer bim Hotel „Ma Maison“ in Ho Chi Minh nach dere 22h Fahrt kha hend hettemer nid chöne ha. Todkaputt, verschwitzt und müed sind mir am5i am morge vorde Hotelpforte gstande. En uh fründliche Nachtwächter hät üs Tüüre göffnet und inelah. Er het fast kei Englisch gredt – üsi müede Blick hend ihm wohl aber glanged – und sofort ischer id Chuchi gsprunge und mit Kafi, Tee und frischem Saft cho, no bevor mir überhaupt icheckt kha hend. Mir sind üs vorcho als wäremer grad bime guete Fründ dihei acho. Es paar Minute spöter isch de en verschlafene Maa d Stäge durab cho – de Bsitzer vom „Ma Maison“. Mit einere Herzlichkeit heter üs in Empfang gno, üses Zimmer zeiged und üs sogar no es chlises Zmorge ufs Zimmer bracht. Wiiterläse

Veröffentlicht unter Uncategorized | Hinterlasse einen Kommentar

Die letschte paar Täg in Kambodscha

Nach üsne crazy Erlebnis vode letschte Täg sindmer für alles gwappnet xi..:)Aber kei Angst…es het um einiges gruhiged bi üs;) Nach dem ufregende Abig mitde Kambodscha Girls simmer denn am nächste Tag mitem Velo is 15km entfernte Krapie gfahre (es verschlafnigs Dörfli am Mekong River glege). Trotz allne befürchtige (de Rose ihri Kollegin chaja nid Velofahre) isches prima gange und mir sind guet vorwerts cho. Wiiterläse

Veröffentlicht unter Uncategorized | Hinterlasse einen Kommentar

Eis crazy Erlebnis nach em andere

Mir hend die letschte 3 Täg so viel crazy Sache da in Cambodia erlebt, mir wüssed scho gar nüme wo afah. Nachdem mer mitem Bus 1h vo Kampot nach Kep gfahre sind, hemmer det grad direkt es chlises Boot gno wo üs zude Rabbit Island bracht het, e chlini, wildi Insle wod Hüehner am Strand umerenned, Fischer ihres Glück versueched und die paar wenige Iwohner no i eifache Bambushüsli wohned. Mir hend irgendwo glese kha dasmer d Insle au z Fuess umrunde chan, was mir denn au gmacht hend. Wiiterläse

Veröffentlicht unter Uncategorized | Hinterlasse einen Kommentar

Endli Sun, Fun and nothing to do!!!

Die 11h Fahrt uf Sihanoukville sind gar nid mal so schlimm xie wiemer üs denkt hend, hemmer doch sogar uf dem super VIP Bus halbwegs chöne lige und pfuse. Dank Laptop hemmer en Desperates Housewives Marathon duregäh und d Ziit isch wie im Bus ähmm Flug vergangeJ Natürlich hend die Iheimische au da ufde Fahrt versuecht Geld usezhole wos nur gaht. Wiiterläse

Veröffentlicht unter Uncategorized | Hinterlasse einen Kommentar